ಲಕ್ಷಾಂತರ ಹೂವುಗಳಲ್ಲಿ ಅರಳಿದ ವಿಜಯನಗರದ ಗತವೈಭವ

ವಿಜಯನಗರ ಸಾಮ್ರಾಜ್ಯದ ಗತವೈಭವ ಸಾರುವ ವಿಶ್ವವಿಖ್ಯಾತ ಹಂಪಿ ಉತ್ಸವದ ನಿಮಿತ್ತ ಆಯೋಜಿಸಲಾದ ಫಲಪುಷ್ಪ ಪ್ರದರ್ಶನದಲ್ಲಿ ಹಂಪಿ ಇತಿಹಾಸ ಮರಕಳಿಸುವ ಐದು ಸ್ಮಾರಕಗಳು ಅಂದಾಜು 1.10 ಲಕ್ಷ ಪುಷ್ಪಗಳಲ್ಲಿ ಅರಳಿರುವುದನ್ನು ಕಂಡು ಜನ ಪುಳಕಿತರಾದರು.

ಉತ್ಸವದ ಅಂಗವಾಗಿ ತೋಟಗಾರಿಕೆ ಇಲಾಖೆ ಹಾಗೂ ಕೃಷಿ ಇಲಾಖೆಯಿಂದ ಹಮ್ಮಿಕೊಳ್ಳಲಾದ ಫಲಪುಷ್ಪ ಪ್ರದರ್ಶನ ಮತ್ತು ಸಿರಿಧಾನ್ಯ ಮೇಳಕ್ಕೆ ಶುಕ್ರವಾರ ಜಿಲ್ಲಾಧಿಕಾರಿ ಕವಿತಾ ಎಸ್.ಮನ್ನಿಕೇರಿ ಚಾಲನೆ ನೀಡಿದರು. ಜಿ.ಪಂ. ಸಿಇಒ ನೋಂಗ್ಜಾಯ್ ಮೊಹಮ್ಮದ್ ಅಲಿ ಅಕ್ರಂ ಶಾ, ತಹಸೀಲ್ದಾರ್ ಶ್ರುತಿ ಮಾಳಪ್ಪ ಗೌಡ್ರ ಸೇರಿದಂತೆ ಇತರರು ಉಪಸ್ಥಿತರಿದ್ದರು. ಫಲಪುಷ್ಪ ಪ್ರದರ್ಶನ ಮತ್ತು ಸಿರಿಧಾನ್ಯ ಮೇಳವು ಎಲ್ಲರ ಆಕರ್ಷಣೆಯನ್ನು ಹೆಚ್ಚಿಸಿತ್ತು.

ಸೇವಂತಿ, ಕೆಂಪು ಹಾಗೂ ಬಿಳಿಗುಲಾಬಿ, ಕಾರ್ನೇಷನ್, ಆಂತೋರಿಯಂ, ಜರ್ಬೇರಾ, ಆರ್ಕಿಡ್ಸ್, ಗ್ಲಾಡಿಯೋಲಸ್, ಸಾಲ್ವಿಯಾ ಸೇರಿದಂತೆ ವಿಜಯನಗರ ಸಾಮ್ರಾಜ್ಯದ ಸುವರ್ಣಯುಗ ನೆನಪಿಸುವ ಮುತ್ತು, ವಜ್ರ, ವೈಢೂರ್ಯ, ಸ್ವರ್ಣಗಳ ಮಾರಾಟದ ರಾಜಬೀದಿ ನಾಡಿನ ಗತವೈಭವ ಸಾರುತ್ತಿವೆ. ಹೂಗಳಿಂದ ನಿರ್ಮಿತವಾದ ಬಡವಿಲಿಂಗ, ಸಾಸಿವೆಕಾಳು ಗಣಪತಿ, ಕೃಷ್ಣದೇವರಾಯರ ಪ್ರತಿಮೆ ಹಾಗೂ ವಿಜಯನಗರ ಲಾಂಛನವನ್ನು ರಚಿಸಲಾಗಿದ್ದು ಜನಮನ ಸೆಳೆದಿದೆ.

ಪುಷ್ಪಲೋಕದಲ್ಲಿ ಅರಳಿದ ಸ್ಮಾರಕಗಳನ್ನು ಪುಷ್ಪ ಪ್ರಿಯರು ಕುತೂಹಲದಿಂದ ವೀಕ್ಷಿಸಿದರು. ಯುವ ಸಮುದಾಯಕ್ಕೆ ಪುಷ್ಪಗಳ ಮೂಲಕ ಸಮಗ್ರ ವಿಜಯನಗರದ ಗತವೈಭವವನ್ನು ತೋಟಗಾರಿಕೆ ಇಲಾಖೆ ಇಲ್ಲಿ ಪರಿಚಯಿಸಿದೆ.

ಇನ್ನು ಸಿರಿಧಾನ್ಯಗಳಲ್ಲಿ ಮೂಡಿಬಂದ ವೃಕ್ಷಮಾತೆ ಸಾಲುಮರದ ತಿಮ್ಮಕ್ಕ ವಿನೀತಳಾಗಿ ಕೈಮುಗಿದು ನಿಂತ ಪ್ರತಿಮೆ ಹಾಗೂ ಪರಿಸರ ರಕ್ಷಣೆ ನೋಡುಗರನ್ನು ಸೆಳೆಯುತ್ತಿದೆ. ಕುಬ್ಜ ಮರಗಳನ್ನು ಬೆಳೆಸುವ ಬೋನ್ಸಾಯ್ ಕಲೆ ಮತ್ತು ಜಿಲ್ಲೆಯ ತೋಟಗಾರಿಕೆ ಬೆಳೆಗಳ ಪರಿಚಯವೂ ಫಲಪುಷ್ಪ ಪ್ರದರ್ಶನದಲ್ಲಿ ದೊರೆಯುತ್ತಿದೆ. ರಾಜ್ಯದ ವಿವಿಧ ಜಿಲ್ಲೆಗಳಿಂದ ಸಾವಿರಾರು ಜನ ಭೇಟಿ ನೀಡಿದ್ದಾರೆ. ಶನಿವಾರ ಮತ್ತು ಭಾನುವಾರ ಇನ್ನು ಹೆಚ್ಚು ಜನ ಬರುವ ನಿರೀಕ್ಷೆ ಇದೆ.

ಈ ಬಾರಿ ಫೆ.15ರಂದು ಶಿವರಾತ್ರಿ ಹಿನ್ನೆಲೆಯಲ್ಲಿ ಪುಷ್ಪ ಲೋಕದಲ್ಲಿ ಅಂದಾಜು 15 ಸಾವಿರಕ್ಕೂ ಅಧಿಕ ಹೂವುಗಳನ್ನು ಬಳಸಿ ಬಡವಿಲಿಂಗ ಶಿವಲಿಂಗ ಹಾಗೂ 20 ಸಾವಿರಕ್ಕೂ ಅಧಿಕ ಹೂವುಗಳಿಂದ ಸಾಸಿವೆಕಾಳು ಗಣಪತಿಯನ್ನು ಹೊಸಪೇಟೆ ಕಲಾವಿದ ಜಗದೀಶ್ ಕೈಚಳಕದಲ್ಲಿ ಮೂಡಿಸಲಾಗಿದೆ. ಪುಷ್ಕರಣಿಯಲ್ಲಿ ಇವುಗಳನ್ನು ನಿರ್ಮಾಣ ಮಾಡಿ ಕಮಲ, ಬ್ರಹ್ಮ ಕಮಲಗಳಿಂದ ಅಲಂಕಾರ ಮಾಡಲಾಗಿದೆ. ಶಿವನ ಪ್ರತಿಕೃತಿಯನ್ನು ನಿರ್ಮಿಸಿ ಭಕ್ತರನ್ನು ಆಕರ್ಷಿಸಲಾಗಿದೆ.